TOG‘ BILAN SUHBAT Deyman: Bulutlarga chulg‘angan, oppoq Tumanli boshingga quyosh to‘kar nur. Kimsanki, qarshimda yuksalib mag‘rur, Uzoq-uzoqlarga boqasan, o‘rtoq? Aks sado der: - Tog‘!.. Deyman: g‘orlaringga qo‘yganman qadam, Ulkan qoyalaring quchib o‘tganman. Ustingdan necha bor uchib o‘tganman. Kimmanki, shunchalar yuksak irodam? Aks sado: - Odam!.. Deyman: Quvonchingga tor kelur jahon, Tongdan boshlanarkan bag‘ringda gurung. Nimadir shunchalar faxring, g‘ururing, Ayt, nelar qilibdi qo‘yningda makon? Aks sado der: - Kon... Deyman:Fanlar sari shaxdam yo‘l oldim, Porloq istiqbolim ko‘z tutar menga. Ishon, bir kun yana kelaman senga. Ammo kim bo‘lib - shu fikr-u xayolim. Aks sado: - Olim... Tilagim shu, o‘rtoq, haqlisan butkul, Ilmlar tog‘i bor qarshimda hali, Javohirlar to‘la bag‘ring ochgali Quchog‘ingga yana kelaman, kutgil! Aks sado der: - Kel!