SAKKIZINCHI MART Bukun o‘zgachadir jilvayi olam, Bukun o‘zgachadir borliqda xanda. Bukun ko‘zlarimga go‘yo quyosh ham Shafaq gulxanida tarang chirmanda. Bukun tong egnida atlasdan kovylak, Shafaqqa o‘ralgan qizlarday gulgun. Ilk bora kо‘z ochib chiqqan boychechak Sanamlar qo‘liga intizor bukun. Bukun go‘zallikning qutlug‘ ayyomi, Qizlarning ko‘klamga mosligidir bu. Yuraklar limmo-lim muhabbat jomi, Bahor kelganining rostligidir bu. Ha, bukun elda ham, dilda ham bahor, Shodlik xandalari falakka tutash. Bukun ertalabdan yigitlar qator, Attor do‘konida atirlar talash Otaxon chollar ham tavoze bilan Yetmish yillik yorin sizlab turibdi. Bukun shoirlar ham o‘z bisotidan Eng yaxshi baytlarni izlab turibdi. Ovora bo‘lmang, ey, hassos shoirlar, Ayol tasviriga ojiz erur she’r. Chunki yor zulfining bir tolasiga Tashbeh topa olmay o‘tgan Alisher. Sevgi asrorini izlamay qo‘ying, Topilmas narsani qidirmoq nechun? Muhabbat sirini bilolmay o‘tgan Karbalo dashtida ovora Majnun. Ming yilcha muqaddam Hofizi Sheroz Bir go‘zal xoliga bo‘lgandi banda. Tasavvur qilolmam, ne der edi u Bukun anjumanda o‘zi bo‘lganda. Balki aytar edi u bir loyiq so‘z, Balki tashbehlari bo‘lar edi fosh. Chunki, ko‘zingizga teng qaysi yulduz, Yuzingiz oldida nimadir quyosh? Siz, axir, siynasi samoni quchgan, Sizning izmingizda zamin-u zamon. Siz oy kemasida oy bo‘lib uchgan, Yorug‘ chehrangizdan olam charog‘on. Bukun o‘zgachadir jilvayi olam, Bukun o‘zgachadir borliqda xanda. Bukun ko‘zlarimga hatto quyosh ham Shafaq gulxanida tarang chirmahda Bukun ayyomingiz muborak qilib, Zumurrad sepjni yoyibdi bahor. Bahoriy qizlarning husniday to‘lib Olam go‘zalligi bo‘lsin barqaror.