QO‘LLAR Qasida Taningda kamtarin a’zo Bu qo‘llardir, bu qo‘llardir, Mudom mehnat uchun,paydo Bu qo‘llardir, bu qo‘llardir. Jahonda toki bunyodsen Ki, nomi odamizodsen, Yurakdek tinmagan aslo Bu qo‘llardir, bu qo‘llardir Hayot deb yerdan uzsang ham, Najot deb ko‘kkа cho‘zsang ham, Tiriksan to senga oshno Bu qo‘llardir, bu qo‘llardir. Zamin bunyodi bu qo‘llar, Uning barbodi bu qo‘llar. Saodat ham buyuk savdo Bu qo‘llardir, bu qo‘llardir. G‘azal baxsh etgan olamga, Ajal keltirgan odamga Bu tigvdir, bu guli ra’no, Bu qo‘llardir, bu qo‘llardir. Sevar yorga gul uzgan ham, Ochiq kaftini cho‘zgan ham Tilab xayr-u zakot tanho, Bu qo‘llardir, bu qo‘llardir. Jahon da’vosini etgan, Jahondin lek ochiq ketgan, Iskandar ilki beda’vo Bu qo‘llardir, bu qo‘llardir. Kulol aylantirar charxin, Qaro loy san’at o‘lgay chin, Bujur, lek san’ati zebo Bu qo‘llardir bu qo‘llardir Tutibdur igna jonona, Bo‘libdur she’r so‘zona O‘zi oltin, ishi tillo Bu qo‘llarclir, bu qo‘llardir. Ajab, nozik bu barmoqlar Terib misqol qilur tog‘lar, Jahonda eng buyuk kimyo Bu qo‘llardir, bu qo‘llardir. Diyorim bir saxiy soqiy Orol unga mayi boqiy, Sir-u mavjli Amudaryo. Bu qo‘llardir bu qo‘llardir Qo‘yib nuqta qasidamga, Boqarman tonggi olamga, Quyoshdan shu’lalarmu yo Bu qo‘llardir, bu qo‘llardir Salom, oftob, salom, dunyo Salom, she’rim, seni tanho Yurakmas aylagan insho Bu qo‘llardir, bu qo‘llardir.