SIR AYTAR G‘UNCHAGA G‘UNCHA... Sir aytar g‘unchaga g‘uncha, Ko‘ngil ko‘ngilni anglaydir. Kabutarni kabutar o‘pgay-u Gul gulni tanlaydir. Misoli ikki yulduzni Qo‘shar taqdir yigit, qizni, Agar yor anglamas bizni, Iloj ne, sho‘r bu manglaydir. Chamanlar ichra rang tanlab, Parivashlar bo‘yaydir lab, Mening yorim labin, yo rab, Yurak qonimga ranglaydir. Qoshi ham o‘smadan zangor, Dema zangor, erur zangbor, Nechukkim qon to‘kib xunxor Qilichlar bo‘yla zanglaydir. G‘am-u hajr-u jafolarda Yonar bulbul navolarda. U bulbulmas, samolarda Mening dodim jaranglaydir.