DOSTONGA YOZ Kel, muhabbat lazzatin Ta’rif etib dostonga yoz, Turfa gullardan tikib, Har baytini bo‘stonga yoz. Sevgi nazmiga jahonning Gulistoni yetmagay. Nur qalam birlan muhabbat Sharhini osmonga yoz. Lolagun aylab yana Mag‘rib-u mashriq ufqini, Bir g‘azal vasliga baxsh et, Bir g‘azal hijronga yoz. Ta’rifi ishq dardiga Etgin yurak qonin siyoh, Dilga yoz dilbar so‘zin, Jonon so‘zini jonga yoz. Dardni sen har kimga aytib Oh-u faryod etma ko‘p, Kuysa joning, jonajoning, Shavqi jon jononga yoz. Bahrasiz oldida, Erkin, Ochma ko‘ngil daftarin, Neki yozsang, dil so‘zini Anglagan insonga yoz.