DILDA ISHQ DARYOCHADIR... Ahli she’r balki kitobim Nazmi ishq deb ochadir, Yo‘q, kitobim, sevgining. Devoniga debochadir. Ko‘zlaring orzusida Tuzdim navo, zebo sanam, Nastarin ko‘z ochib aytsin, She’ri, ham zebochadir. Balki u zebocha ermas, Balki u bir g‘unchadir, Husning oftobida ammo Kun sayin zeb ochadir. Voh, ajab, nomingni aytsam Lol bo‘lur til ham ko‘ngil, She’r ipi nogoh qalamning Ignasidan qochadir. Erkinning devonidan hech To‘lmasa, ko‘ngling, ne tong, Tilda she’r bir qatra bo‘lsa, Dilda ishq daryochadir.