VATAN ISTAGI Bu Vatanda bir Vatan Qurmoqni istaydir ko‘ngil, O‘zni ozod qush kabi Ko‘rmoqni istaydir ko‘ngil. Bu Vatan timsoli bo‘lsa Tong quyoshi shu'lavor, Shu’lalar qo‘ynida charx - Urmoqni istaydir ko‘ngil. Ul Vatanga bayroq - insof, Tug‘i sarhad, muhri - mehr, Sarhad uzra soqchidek Turmoqni istaydir ko‘ngil. Kim bu tuproq qadrin istar Aylamoq tuproqqa teng, Ko‘ziga tuproq bilan Urmoqni istaydir ko‘ngil. Ul Vatan yelkanlarini Ma’rifat ummonida Qiblayi imon sari Burmoqni istaydir ko‘ngil. Bas, yetar yolg‘on saodat, Yolg‘on erk, yolg‘on vatan, Hurriyat zavqini chin Surmoqni istaydir ko‘ngil. Qutlug‘ istiqlol kunida, Ey Vatan, bag‘ringda shod Erkin o‘g‘loning bo‘lib Yurmoqni istaydir ko‘ngil.