НУТҚ ҲАҚИДА Ҳар сўзида «бу», «ану», «Ҳалиги», «сўнг», «акақа», «Бу-бу» дейди — нима бу, «Унақа»си — қанақа? Тилига келиб қолган Сўздан қайта олмаса, «Бу» қўшмасдан саволга Жавоб айта олмаса. Гоҳи қовушмай сўзи, Гапидан тўхтаб қолса. Яхши билса ҳам ўзи, Зўрғагина «3» олса. Ўзингиз ўйлаб кўринг, Нима, бу, қанақаси? Қачон қолар Ўткирнинг «Нима», «бу», «анақаси»? Одатланганман, дединг, Тўғри, ҳамма гап шунда. Лекин ахир, ўз тилинг Ўзингга бўйсунсин-да. Тўғри, аниқ гап тузиб, Жавоб бергин сўроққа, Хизмат қилсин ҳар сўзинг Фикрингни тўлатмоққа. Мазмун номли мўлжалга Сўз — отилган ўқ бўлсин. Нишонга тегмай қолган Битта ўқ ҳам йўқ бўлсин. Дўстим Ўткиржон, буни Ёдингда тут ҳар доим, Оташин нотиғини Минбарлар кутар доим.