ОЛМА Мева берди етилиб бу йил Мен боғимга ўтқазган ниҳол. Меваларки, чўғдай қип-қизил, Ҳусни ёқут, ширинликда бол. Лабларидан томизиб шарбат, Ол, е, дейди, армонда қолма! Лекин шунга ҳайронман фақат, Нега уни дейдилар «олма»? Олма экса боғига ҳар ким, Меҳмонига, ол, е, демасми? «Олма» менинг меҳмондўст халқим — Одатига ёт сўз эмасми? Мева берди етилиб бу йил Мен ардоқлаб ўстирган ниҳол. Олмаларки, шафакдай қизил, Лекин номи олма эмас, ол!