КЕРАК Бизнинг шифокорлар инсондаги ул Руҳий олам билан бўлгунча машғул, Ўттиз йил бор экан, ҳозирча маъқул — Касалхоналарга етти қопдан кул, Ўнтадан кинначи хола керакдир. Ошхоналарда то еб бўлгунча ош, Вақтинча белгилаб чўнтак пул — маош, Териб бермоқ учун сумалакка тош, Баҳор мавсумида элликтадан ёш, Оёқ-қўли чаққон бола керакдир. Госпланга эса бозор аҳволин Айтиб турмоқ учун тўрт-беш йил олдин — Режа қилмасин то ўтган аср молин — Олий малакали етмишта фолбин, Келажакни айтиб турувчи керак. Шаҳар транспортига ва ҳайратомуз, Ёз ойлари тандир, қиш ойлари муз Квартираларга тегмасин деб кўз, Шаҳар Советига бир минг етти юз Исириқ тутатиб турувчи керак.