САВАҒИЧ Савағич пахтага Дейди: — Қалайсан? Қўлимга тушдинг-ку, Шошмай тур, сени... Савағич! Пахтани нега савайсан? Пахтада не гуноҳ? Савала мени! Пахтанинг тани оқ, Юмшоқ бадани. Нозик-ниҳол экин, Шафқатинг қани? Ахир менинг юртим Пахта ватани, Пахтада не гуноҳ? Савала мени! Кеча беҳи эдинг, Қуридинг, сўлдинг, Қирқилдинг, йўнилдинг, Савағич бўлдинг. Сен бунга пахтани Айбдор деб билдинг, Пахтада не гуноҳ? Савала мени! Боғ-роғлар кесилса, Пахтадами айб? Яйловлар бузилса, Пахтадами айб? Гўдаклар эзилса, Пахтадами айб? Пахтада не гуноҳ? Савала мени! Куни кеча эди... Сулув келинчак Соянгда қурганча Рангин беланчак Бола аллаларди... Сўлди у чечак... Пахтада не гуноҳ? Савала мени! Қўш хивич, чийиллаб Ғазабкор, хунхор, Бечора пахтага Еткурма озор. Сувинг ичган бўлса У сендан ночор, Пахтада не гуноҳ, Савала мени! Гарчи шеърда номи Олтину маржон, Турупдан бекадр, Шолғомдан арзон. Деҳқон шу арзонга Йил бўйи сарсон, Пахтада не гуноҳ? Савала мени! Мени ур, пахтани Куйлаган менман. Эртаю кеч уни Ўйлаган менман, Оламга мақтаниб Сўйлаган менман, Пахтада не гуноҳ? Савала мени! Уни мадҳ этмоқнинг Моҳири ўзим, Мадҳимга ишондим Охири ўзим, Турғунлик даврининг Шоири ўзим, Пахтада не гуноҳ? Савала мени! Элим бурч деганда Пахтани билган, Зарур бўлганида Кўрпадан шилган, Битта чаноқ учун Одам отилган, Пахтада не гуноҳ? Савала мени! Жони сабил бўлган Инсонлар учун, Етимлар кўксида Фиғонлар учун, Афсус, надоматлар, Армонлар учун Пахтада не гуноҳ? Савала мени! Кўракдек оғизни Юмармиз ҳар дам, Очмасам чаноқдек Дилни энди ҳам Мен нечук шоирман, Мен нечук одам? Пахтада не гуноҳ? Савала мени!