MENDA BOR ISHQ ICHRA G‘AM... Menda bor ishq ichra g‘am, Hajr ichra dard ul oyda yo‘q, Dardni dard bilmas kishiga So‘zlamoqdan foyda yo‘q. Ko‘z yoshim ko‘rganda soy ham Sharqirab kulsa ne tong, Bor mening ko‘ksim aro Toshqinki, hech bir soyda yo‘q. Dard bilan qormish ilohim Loyimiz taqdir azal, O‘zga dardin anglamoq lek Biz qorilgan loyda yo‘q. Olam ahli ichra dildosh Izlama, kezma jahon, . Zarga zor har yerda bordir, Zorga zor hech joyda yo‘q. Mayli, zar sizlarga bo‘lsin, Menga zor ishq ichra bas, Bu xazinam ahli dunyo Ichra hech bir boyda yo‘q.