БИЗДАН КЕЙИН ҲЕЧ БИР АВЛОД ҚАЙТА ҚУРМАСИН Олғир учун қайта қуриш — Бир қозон шўрва, Элдан бурун коса олиб Чопмоқ бўлади. Худбин учун қайта қуриш — Каттакон кўрпа, Бир амаллаб ўз устини Ёпмоқ бўлади. Жоҳил учун қайта қуриш — Найза урмоқдир, Энг қобил, энг пок юракни Нишонга олиб. Бизнинг даврон келди дея Димоғи чоғдир, Биладики, тош биллурдан Ҳамиша ғолиб. Қайта қуриш — Сафсатабоз учун бир чолғу, Унга эски оҳангларни Тез жо қилади. Бир хил тинғир-тинғирини Чалабериб у, Энг табаррук қўшиқни ҳам Расво қилади. Бюрократга қайта қуриш — Дорбозлик демак, Мувозанат лангар чўпин Қаердан тутсин? Бугун омон, эрта тамом, Ширин жон ҳалак, Тарих ортга қайтмас, Шўрлик нимани кутсин? Қайта қуриш — Омади йўқ шоирга — қудуқ, Искандарнинг шохи бор деб Секин айтади. Бу қудукда қамиш унмас, Гапдан фойда йўқ, Фақат қорин шишганини Ёзиб қайтади. Бу бошлиққа қайта қуриш — Шахмат ўйини, Ҳар кун шахмат доналарин Қайта терар у. Коллегия эслатади Девлар тўйини, Нечта жонни янчганидан Рапорт берар у. Кўр тутганин қўймас экан, Эшитганин кар, Бу одамнинг миясида Беш-ўнта шиор. Коммуна деб атар бўлса Очликни агар, Принципга содиқ — Очдан ўлар бахтиёр. Бу олимни — Замбаракка ўхшатиш мумкин. Орқа билан жангга кирар — Сабаби аён. У орқага қараб туриб Ўтмишнинг мулкин Тўпга тутса Қолар тарих ўрнида тўзон. Дерлар: урсанг эти қотар, Гар сўксанг — бети, Одамзод ҳам айланар ер Курраси билан. Бу кас аввал орден билан Мақтанар эди, Бугун эса мақтанади Ғурраси билан. Ҳар оғизга бир-бир куйдик Биз аччиқ дори, Ўзимиз-чи? Ўзимизга Не қайта қуриш? Биз учун у омбир! Оғриқ тишлар қатори, Миямизда занглаб қолган Михни суғуриш. Қайта қуриш — кетмон, Бир вақт пастдан юқори Қазилган у терс ариқни Ўрнига буриш. У — бульдозер — Манманликдан топилган бари Иллатларни кечаги кун Жарига суриш. Ҳўжакўрсин қабристони, Ёлғон мозори, Эгасизлик гўрин ясаш — Бу қайта қуриш. Олам аро уч мингинчи Йиллар сардори Ватанга мос ўрин ясаш — Бу қайта қуриш. Мен учун у деразадан Кирган шамолдир, Бу шамолдан қоғозларим Афтодаҳолдир. Улар учар, мен ортидан Қараб тураман, Шеърим, энди мен ҳам сени Қайта қураман. Кунлар кўрдик, Остонада турган истеъдод Бизнинг кўрган у кунларни Қайта кўрмасин. Шундай қайта қурайликки, Энди умрбод Биздан кейин ҳеч бир авлод Қайта қурмасин.