АЖАБ ЭРМАС (Завқиёна) Бу кунлар катта йўлда Бир довон бўлса ажаб эрмас, Муқаррар ортида йўл Кенг, равон бўлса ажаб эрмас, Ватанга сидқу имон, Имтиҳон бўлса ажаб эрмас, Фаровон юрту олам, Тинч жаҳон бўлса ажаб эрмас, Биз этган барча орзулар Аён бўлса ажаб эрмас. Не ишлар кечди бошлардин, У кунлар қайтмагай зинҳор, Улуғвор танга энди Номуносиб тўн бичилмас тор, Унут бўлгай чекилган дард, Жароҳат, кулфату озор, Кўнгилда қолмагай ҳеч доғ, Ғубордан тоза бўлмоқ бор, Булут даврон шамолида Ниҳон бўлса ажаб эрмас. Сен эй, сен она юртим, Кўҳнаю ёш Ўзбекистоним, Ҳамиша сен ўзингсан Боиси ашъору достоним, Ғурурим, номусим, шодлик, ғамим, Ободу пайҳоним, Кўтар бошингни мағрур, Ҳақлисан, шавкатли деҳқоним, Бошингда шиша янглиғ Осмон бўлса ажаб эрмас. Қадим туркий мақол бор: Бел қолар, беткай кетар, дерлар, Умидли бу жаҳонда Эл қолар, беклар кетар, дерлар, Қолар дўстлик, садоқат, Таънаю кеклар кетар, дерлар, Оқар оққувчи дарё, Хас-чўпу чирклар кетар, дерлар, Бу кунлар эътиқодга Имтиҳон бўлса ажаб эрмас. Яқин икки мингинчи йил, Ёрур юз бирла киргаймиз, Саховат тўла дастурхон, Нону туз бирла киргаймиз, Салимимон аталган Йўлчи юлдуз бирла киргаймиз, Ҳақиқатга, адолатга Очиқ кўз бирла киргаймиз, (Ки Завқий орзу этган Замон бўлса ажаб эрмас), Етиб етмишга Эркин Навқирон бўлса ажаб эрмас.