ПИЁЛА Чинни заводи изларига Тупроқ ўзи не аслан, Ундан гувола бўлгай, Жонон қўлида тупроқ Жонон пиёла бўлгай. Бир коса ичра лим-лим Тилло сувидур офтоб, Теккач пиёлага нур — Зарнақш тола бўлгай. Тонг унга бергай оқлик, Солгай баҳор гуллар, Май нўш этиб шафақгун Бечора лола бўлгай. Йўқ, ул пиёла эрмас, Санъат экан мукаммал, Кўрганда етти иқлим Ҳайрону вола бўлгай. Жонон пиёла қилган Жонон қўлидан Эркин Май ичмаса дилида — Ўлгунча нола бўлгай.