ИЛЬЗА ХОНИМ Она тилим! Меҳринг бу қадар Азиз экан дилу жонимга. Асир бўлиб лолу мусаҳҳар Термуламан Ильза хонимга. Термуламан Ильза хонимга Кўзларимга ишонмай ҳайрон. Амриколик хушрўй олима Сўзлар эди ўзбекча равон. «Сиэттлга хуш келибсизлар Олис юртдан йўл босиб йироқ. Танишинглар, бу йигит, қизлар Ўзбекчадан олмоқда сабок...» Дастурхонда парварда, пашмак, Хандон писта, қип-қизил ширмой. Атлас кийган сулув келинчак Одоб билан узатар кўк чой. Мен эс-ҳушим йиғмасдан ҳали Қулоғимга дилбар куй етди. Накамури — япон гўзали «Тановар»га чарх уриб кетди. Она юртим! Меҳринг бу қадар Азиз экан дилу жонимга. Термулганча лолу масаҳҳар Сўз айтаман Ильза хонимга. — Минг ташаккур ўзбек элидан, Яшанг, дунё тургунча туринг. Илтимосим, шогирдлар билан Диёримга ташриф буюринг. Келинг, сизни она юрт учун Фидолар бир тинглаб қувонсин. Бу қувончдан лекин бир умр Жудолар ҳам тингласин, ёнсин. Уз элати меҳридан дилин Ёт тутганлар сизни эшитсин. Ўз юртида ўз она тилин Унутганлар сизни эшитсин.