ТўЙ ОҚШОМИДА Икки ошиқ ўхшар юлдузлар аро Учиб юрган ёндош сайёраларга. Севги фазосида улар бор танҳо, Не парво ердаги овораларга. Улар биздан олис қилмоқда парвоз, Сомон юлдузлари кумуш пойандоз... Сиз эса, янгалар, таванда шаввоз Чучвара уясиз тоғораларга. Уларнинг қалбида энг юксак туйғу, Қудрати олийга турар рўбарў, Сиз эса, нотиқлар, сизга не қайғу, Ҳадеб панд ўқийсиз бечораларга. Севги — япроқларнинг шитирлашидир. Севги — юлдузларнинг шивирлашидир. Севгида самовий сукут яхшидир, Сиз карнай қўшасиз ноғораларга. Ошиқлар ғизоси бу оқшом висол, Ташналик давоси лабдаги зилол. Ичсинлар оташин шароби иқбол, Қўйинг, олов ёқманг мохораларга. Интизор жонларга беринг ал-амон, Муҳаббат аршида урсинлар жавлон. Эй, сен гўзал синглим, ошиқ укажон! Оқ йўл саодатли ситораларга.