МАНФААТ ФАЛСАФАСИ Мен сенга очай кўнглим, ўзгага баён бўлмас, Иккимизга маълум сир Элга ҳеч аён бўлмас. Балки, мен каби ҳеч ким Сенга жонажон бўлмас, Қўлни қўлга берсак биз Ҳар қалай зиён бўлмас, Менга ҳам бўлур яхши, Сенга ҳам ёмон бўлмас. Бўлма соддадил, дўстим, _ Бандаи хаёл бўлма, Тўғриликка ҳам ҳад бор, Бунчалар ҳалол бўлма. Хўжадек кўтар қаддинг, Жўжадек увол бўлма, Кимки ўз нафин билса Ўзгага товон бўлмас, Менга ҳам бўлар яхши, Сенга ҳам ёмон бўлмас. Сендан ул ва мендан бул, қўлни қўл ювар, дўстим, Нафи йўқ жиян келса Тоға ҳам қувар, дўстим. Битта қўл узатса лой, Битта қўл сувар, дўстим, Кимга тишлатиб қўйсанг, Унда тил-забон бўлмас, Унга ҳам бўлур яхши Сенга ҳам ёмон бўлмас. Бўлса ҳам қилич кескир Ёнда тутди қалқонин, Манфаатдан ўзга йўқ Даҳр аро асос-қонун. Кимга сен суянч бўлсанг, У сенга берар жонин, Шубҳа сенда ҳам бўлмас, Унда ҳам гумон бўлмас, Унга ҳам бўлур яхши, Сенга ҳам ёмон бўлмас. Мартаба кулоҳига Етса бир куни бошинг, Аввало яқинроқ тут Хеш ила қариндошинг, қуллуқ этгучи сенга Бўлса ёру йўлдошинг, Бир куни товонингга Киргучи тикон бўлмас, Унга ҳам бўлур яхши, Сенга ҳам ёмон бўлмас. Кимда бўлса истеъдод, Кўзласа узоқларни, Сен унинг танобин торт, Қўллагин пачоқларни, Сув юзида ўйнатсанг Қалқитиб пўчоқларни, Ўз йўлин топиб сендан Бир сари равон бўлмас, Унга ҳам бўлур яхши, Сенга ҳам ёмои бўлмас. Ушбу фалсафа бирлан Сен узоққа боргайсан, Яъни бир куни жарга, Ё тузоққа боргайсан, Ким билан ўшал фурсат Иттифоққа боргайсан! Мапфаатпарастлик бул Маслагинг омон бўлмас, Сенга... билмадим, аммо Элга ҳеч ёмон бўлмас.