JON TUGAMAYDIR Olamda ayol madhiga doston tugamaydir, Chun ishq tugamas, ishqdagi armon tugamaydir. Nazm etdi tugal Hofiz-u Sa’diy-U, Navoiy, Ne qoldi, demang, shoiri davron tugamaydir. Gar arsayi ash’or esa ishq bahsiga maydon, Maydonda chavandoz ko‘p-u, maydon tugamaydir. Husn ahli uchun bo‘lmas ado noz-u adolar, Ishq ahli uchun nola-yu afg‘on tugamaydir. Har neki yonar, yo‘q bo‘ladir, lekin ajabkim, Mangu yonarak ishq o‘tida, jon tugamaydir.