MUHABBAT BIRLA Muhabbat birla chekkan - G‘urbating rohat bilan tengdur. Muhabbatsiz va lekin Ishrating kulfat bilan tengdur. Unga jon-u jahonim Boy berib olamda boydurman, Sening, ey bemuhabbat, Nusrating hasrat bilan tengdur. Riyo ahlining aldoq - Hurmatiga nafratim bordur, Sening, ey do‘st, menga Nafrating shafqat bilan tengdur. Muhabbat otashini Hech qachon do‘zaxga teng qilmam, Nechunkim, menga nurli - Tal’ating jannat bilan tengdur. Kechib qo‘y, oshiq o‘lgach, Ikki olam mulkidan, Erkin, Muhabbat ichra barcha - Zahmating davlat bilan tengdur.