ДЕҲЛИ АЭРОПОРТИДА БЎЛГАН ВОҚЕА Ташқари қирқ саккиз даража... «Боинг» Бомбай парвозига турар эди тахт. — Жаноб, юкингизни бу ёққа қўйинг, Ўзингиз бу ердан ўтинг, марҳамат. Узун милтиқ осган соқчилар огоҳ, Бамисли локатор кўз, қулоқлари. Безовта чириллаб қолди-ку ногоҳ Электрон назорат кўнғироқлари. Ҳамроҳим хижолат. Бошин тебратиб Чала инглизча узр айта-айта Сўнгги чақгача чўнтак бўшатиб Магнит қопқасига йўл олар кайта. Лекин қўнғироқлар тинчиса қани, Таҳликалик ёнар савил чироқлар. — Нима яширгансиз, шоир оғайни? Ҳазил қилишади ҳамкасб ўртоқлар. Полисменга эса кулги бегона, Пайпаслаб тинтувға бошлар бадгумон. Ҳеч нарса тополмас ва лекин яна Қўнғироқ чириллар. Нозирлар ҳайрон. Шунда таржимонга дер кекса шоир: «Тушунтир, ҳеч нарса яширганим йўқ. Сергак аппарати илгаган темир — Кўкрагим остида қолиб кетган ўқ. қирқ йил яшаяпмаи ўша ўқ билан, Борлигин билдирар баҳор чоғлари... қайси юртга қадам қўйманг дафъатан Бонг урар назорат қўнғироқлари. У менга Смоленск жангидаи ёдгор, Уруш ўчмас қилиб қолдирган дастхат. Айт, узр на даркор, Афсус на даркор, Менга ачинмасин — Ишонсин фақат.» Биз қотдик. Учмасдан қизил чироқлар «Ҳушёр!» ёзувида пириллаб қолди. Назоратгоҳ ичра бор қўнғироқлар Худди жони бордек чириллаб қолди.