SOF HAVONING FOYDASI Qirq yil hayot qurdik Xotinjon bilan. Qirq yil bir-birovga Yondosh, mehribon. Uni «jonim» desam Hayajon bilan. U meni ataydi Hanuz «akajon». Oltmish besh yoshimda «Akajon» desa - Ne ajab, men hamon Yoshlikka oshno. Yoshlikning bir siri Ahillik esa, Ikkinchisi - sayr, Musaffo havo. Faqat o‘zimizga Ayon sirimiz, Kelishib olganmiz Go‘shangadayoq - Jahldan junbishga Kelsak birimiz, Havoga chiqamiz Boshqamiz shu choq. Tanga davo ekan Sof havo, bilsam, Necha qor, yomg‘irda Ividim, qotdim. Xotin bilan qirq yil Yashagan bo‘lsam, Qirq yil sof havoda Kechdi hayotim. Shundoq umr ko‘rdik Xotinjon bilan, U meni asradi Sog‘lom, navqiron. Uni «jonim» desam Hayajon bilan, U meni ataydi Hanuz «akajon».