DUR BO‘LIB TOMGAYMI SO‘Z Dur bo‘lib tomgaymi so‘z Kiprikka yosh inmay turib, Marvarid bermas sadaf, Sinmay turib, sinmay turib?! El aro topgaymi qadrin So‘z ko‘ngil ummonida Marvarid tutgan sadafdek Oncha berkinmay turib?! Bu zamon daryosi tezdir, Ahli she’r istar zulol, So‘z netib ruhbaxsh bo‘lur, Dilkosada tinmay turib. Qalb bu ohanglar o‘chog‘i Unda so‘z so‘zonadir, Qayda keskir bo‘ldi shamshir, O‘tga solinmay turib. Ahli so‘z, g‘aflat elin siz Uyg‘oting bongso‘z ila, Kemangizga so‘nggi yo‘lning Bongi chalinmay turib.