KO‘RSATKICH BARMOQ Umring tahlikada, qo‘rqib yashading, Yonmading, tutundek burqsib yashading. Barmoqlaring ichra baridan ko‘proq Senga xizmat qildi ko‘rsatkich barmoq. Labga bosding, shiftga ishora qilding, Ko‘pni tilsiz qilding, bechora qilding. Bir zamon ko‘rsatkich barmoqni qo‘llab Omon qolding, dorga do‘stingni yo‘llab. Endi oshkorlikdan kuyib turibsan, Barmoqni chakkangga qo‘yib turibsan. Sirsiz hayot senga bag‘oyat mushkul, Yuragingda yashar itoatli qul. Tilaysan, Beriya tirilib kelsa, Norasmiy guruhlar qirilib ketsa. Bu kunlar tillarga bo‘lsa-yu qarmoq, Yana kuchga kirsa ko‘rsatkich barmoq.