KERAK BO‘LSA Men bor, senga bir haqgo‘y - Devona kerak bo‘lsa, Yo‘qman, tili qand nodo‘st Parvona kerak bo‘lsa. Istarmi safe ko‘ngling, Bor unda saroylarga, Kel bunda, esang dardlik, G‘amxona kerak bo‘lsa, Hamdam o‘zim, ey oshno, Malham so‘zim, ey oshno, Ikki ko‘zim, ey oshno, Hayrona kerak bo‘lsa. Bergum na kerak senga, Jon senga, yurak senga, Zardobga to‘lib ketgan - Paymona kerak bo‘lsa. Bog‘imni makon etgan Ey siz gala boyqushlar, Ko‘ksimga qo‘ning, Sizga Vayrona kerak bo‘lsa Vayron chamanim vodiy, Ko‘ksimda uning dodi, Faryodga qulog‘ing och, Farg‘ona kerak bo‘lsa. Naylay, bu og‘ir so‘zlar, Quvmang meni, ey do‘stlar, Oqillar aro bitta Devona kerak bo‘lsa.