SHE’R VA SHAXMAT Katak qog‘ozdagi to‘rt yo‘l she’r kabi Shaxmat donalari saf chekkan qator. Nayzador fili-yu shahsuvor aspi, Tug‘bardor farzini hujumga tayyor. Shaxmatni she’r bilan qiyos ayladim, Bilimdon o‘quvchim, qilma e’tiroz. She’r axir emasmi shaxmatdek qadim, Shaxmatda yo‘qmi yo she’riy ehtiros. Go‘zallik, nafosat, kurash va san’at She’r ila shaxmatga azaliy udum. Ming yillik umrida ular beshafqatr Doimo shohlarga boshlagan hujum. Shaxmat ko‘p o‘ynalgan, she’r ko‘p yozilgan, Odatiy yurishlar hammamizga yod. Bobolar o‘ynagan usullar bilan, Ular nabirasin qilib bo‘lmas mot. O‘yin ermak emas she’r ham, shaxmat ham - Aqllar kurashi, tuyg‘ular jangi. Bu janggda qo‘yilgan har bitta qadam Odil-u haq bo‘lsin, go‘zal va yangi. Men orzu qilaman, to‘rt yo‘l she’r bitib, Elga manzur qilsam aqalli bir bor. Shaxmatni ilk bora ixtiro etib Quvongan hindidek edim baxtiyor. Shaxmat abadiydir, she’r abadiy, Yurish tugamas-u so‘z bo‘lmas tamom. Shaxmat taxtasida, she’r maydonida G‘oyalar kurashi etadi davom.