CHASHMA QOSHIDA Xayriddin SALOHga Qaytar edim tog‘ sayridan, Ko‘p edim tashna. Horg‘in edim, yo‘lda birdan Uchradi chashma. Jilvalanib oqar edi Muzdek zilol suv. Suv labidan boqar edi Shahlo ko‘z suluv. Yetib bordim, kuylab berdi U sho‘x, xush ovoz. Qiz rozini so‘ylab berdi Qo‘lidagi soz. U kuyladi, men tingladim, Men kuyladim - u. Seni mangu saqlar yodim, Ko‘zlari ohu! Qalbda hamon osha yoz-u O‘sha ko‘k chashma. O‘sha soz-u o‘sha noz-u O‘sha karashma.