SURAT Qayerdadir ko‘rganman uni, Bir daqiqa bo‘lganman ulfat, Eslolmayman, ammo qay kuni, Qay daqiqa, qay dam, qay holat. Ko‘zlarida ajib muammo, Tilsiz surat boqar menga jim. E, u o‘sha... Topildi go‘yo Unut bo‘lgan bir bo‘lak umrim. Ko‘z oldimdan o‘tadi bir-bir - Allaqanday tumanli, xira - Xayolimning qay burchidadir... Yo‘qolmoqchi bo‘lgan xotira. U kunlarni tiklar xayolim, Yodga kelar barcha, barchasi... Odamlar, Siz mening hayotim, Har biringiz umrim parchasi?